Skip to content Skip to left sidebar Skip to right sidebar Skip to footer

Étiquette : AKA

[Ajennda pou Laprès] Lendi Laprès # 17 : Lansman ofisyèl mwa lang ak kilti kreyòl la

Ministè Kominikasyon envite laprès nan konferans li bay chak semèn yo «Lendi Laprès», jou lendi k ap 2 oktòb 2017 la, a 9è: 45 nan maten, nan lokal Ministè a ki chita nan # 23, Avni Lamatinyè (Bwa Vèna).

Nan konferans pou laprès sa a, Ministè Kominikasyon ap resevwa Akademi Kreyòl Ayisyen an (AKA) pou lansman ofisyèl mwa lang ak kilti kreyòl la.

« Jèn yo, an nou sèvi ak lang nou tout kote san baboukèt ! », se sou tèm sila a, Akademi an ap selebre mwa lang ak kilti kreyòl la ane sa a. Pandan konferans pou laprès sa a, AKA ap pwofite anonse tout aktivite li menm ak enstitisyon patnè l yo ap gen pou òganize tout kote nan peyi Dayiti ak aletranje.

Ministè Kominikasyon konte sou prezans manm Laprès yo pandan l ap mande yo pou yo sou plas nan lè ki fikse a.

Konferans « Lendi Laprès » # 17 la ap an dirèk sou Radio Nationale d’Haïti (RNH) (Radyo Nasyonal Ayiti), Télévision Nationale d’Haïti (TNH), (Televizyon Nasyonal Ayiti) ak sou plizyè platfòm rezo sosyal.

Premye rezolisyon sou òtograf kreyòl ayisyen an

Akademi Kreyol Ayisyen nan tèt kole ak Ministè Edikasyon Nasyonal ak kolaborasyon Fakilte Lengwistik Aplike prezante, jedi 1e jen 2017 la, Premye rezolisyon sou òtograf kreyòl ayisyen an.

Òtograf sa a ki gen 32 fonèm, se rezilta plizyè jounen atelye ak reprezantan dives sektè nan peyi a k ap travay sou lang kreyòl ayisyen an tankou ekriven, pwofesè, konseptè liv kreyòl, editè, lengwis, tradiktè elatriye. Aprè brase lide nan atelye yo, komisyon syantifik Akademi an te analize tout pwopozisyon yo epi vini avèk nouvo dispozisyon. Akademisyen yo te adopte desizyon pou rekondwi  alfabè kreyòl 1979 la avèk kèk chanjman nan aspè ki konsène òtograf  lang la.

Ministè Kilti ak Kominikasyon se youn nan 9 enstisyon nasyonal ki fonde Akademi Kreyòl Ayisyen an, li reprezante ak 2 manm: Akademisyen Claude Pierre ak Akademisyen Jean Pauris Jean Baptiste k ap jwe wòl Prezidan Konsèy Administrasyon an.