Ministè Kondisyon Fanm distribiye manje bay elèv filo nan depatman lwès la, nan kad premye jounen egzamen ofisyèl bakaloreya

Jounen lendi 14 jiyè 2025 lan, nan kad premye jounen egzamen ofisyèl pou elèv nan klas filo yo, Ministè Kondisyon Fanm ak Dwa Fanm fè kè elèv yo kontan pandan y ap sibi eprèv egzamen ofisyèl yo.

Pou premye jounen an sèlman ekip Ministè a distribiye kolasyon bay 350 elèv ki t ap konpoze nan « Collège Jean Dominique », 385 elèv nan « collège Saint François Xavier », 350 nan « École Congréganiste Notre Dame du Rosaire » epi 350 lòt ki t ap konpoze nan « Centre d’études classiques Hadassa », nan Komin Petyonvil.

Toujou nan komin Petyonvil, 385 elèv ki t ap sibi egzamen yo nan « Lycée Benoit Batraville » ki chita nan Laboule 13, te resevwa manje, 350 lòt ki te nan « Institution la Sainte Famille », 350 nan « Institution America de Petion-Ville » ak 350 elèv ki te tonbe nan « Institution Mixte L’aurore » ki chita nan Berthé, nan komin Petyonvil te manje vant deboutonnen gras ak gwo inisyativ Ministè a.

Seri distribisyon manje nan kad egzamen ofisyèl yo montre volonte Minis Kondisyon Fanm ak Dwa Fanm nan, Madam Pedrica SAINT JEAN, ki pote kole nan soutni ledikasyon timoun yo, sitou tifi yo, selon enstriksyon Gouvènman an ak KPT a, paske li kwè ledikasyon se pi gwo zouti yon peyi ka itilize pou konbat vyolans sou fanm ak tifi pou rive gen yon sosyte san fòs kote. Inisyativ sa a vini tou nan lide pou ede sitou elèv ki nan sitiyasyon difisil yo, sila ki deplase yo pou ede yo pase eprèv sa a byen.

N ap raple, se pa sèlman nan zòn metwopolitèn Pòtoprens lan Ministè a ap bay manje. Inisyativ sa a kouvri tout depatman lwès la ak divès lòt zòn nan peyi a. Akoz enkonvenyan ki te genyen jounen lendi 14 jiyè a, distribisyon an pat rive fèt nan kèk zòn nan premye jou egzamen yo, men ekip la mobilize pou rapousuiv zèv sa a apati madi 15 jiyè a, jouk egzamen yo rive nan bout yo, pou timoun yo ka byen manje epi byen konpoze, paske ledikasyon pa danse kole ak grangou. Bay lamanjay nan lekòl yo se make yon pwen sou vyolans nan milye eskolè yo.

INITE KOMINIKASYON MKFDF